Ook in 2017 gung de Urkampf twischen de beiden wurfstärksten Boßeldörper op de Dithmarscher Geest för de Hastedter ut. Morgens um 9 gung dat mit 20 Schmieters op beide Sieden vun Hastedt in Richtung Frestedt. Dorbie kunn de Frestedter wegen leichte Bleier bi den eersten Hastedter Affschmieter een ganze Tied Vörtoch holn. Allerdings kunn de Frestedter den Heimwech ni so richti finnen un hebbt mit een langen Bogen een Tied lang neben de Bohn leegen un dormit een poor Meters verschenkt. So kunn de Hastedter mit veele sehr starke Würfe den Rückstand opholen. As jüs dat eerste Schott för Hastedt in Sicht weer, geev dat op eene vun Gülle glitschig worne Steed een kapitalen Hastedter Bleier. So bleev de Kampf wiederhin spannend, bit wi de Frestedter Feldmark to foten haln. Dor fullen denn doch noch Schott Nummer een un twee för de Hastedter, de sick nu dat Heft ni mehr ut de Hand nehmen leeten. Ganz an End muß een Schott noch wedder insett warn, um de poor Schreet, de de Frestetder Kugel wieder vörn leeg, weller optoholen. So weer de Hastedter Vörsprung 1 Schott un 54 Meter, un de 11. Sieg anne Reeg för Hastedt stünn fast. Wie in alle Johrn hebbt beide Dörper ganz grooten Boßelsport wiest un de ca. hunnert Lüüd, de dörch de Feldmark lopen sünd, kreegen richtig wat to seen.

Int Frestedter Sportlerheim freut sick beide Bürgermeisters över een sehr guden un fairen Wettkampf un över de innige Fründschaft twischen de beiden Dörper, de geern ok mol tosomen wat op de Been stellt. In 2018 geiht dat denn mol weller um ein Goldene Boßel, man kann nu al gespannt ween, wie dat bilopen ward.

De Wanderpokal kann ook in 2017 an sien gewohnte Steed stohn blieven ...

No de politische Würdigung vun den Urkampf keem de sportliche Aspekt vun de Boßel-Obmänner an de Reeg, wobie de traditionellen, luut dunnernden “Lüch-Ops” jede Reed ton Affschluß bröchen. Mit een schönet Sponfarken vun de Dithmarscher Grillschüün un een poor Kaltgetränke hebbt sick de Sportler un Toschauer stärkt un den Wettkampf utklingen loten.